اكلات شعبية لهذا الموسم

بسم الله الرحمان الرحيم
أولا ارحب بكم في مطبخ كتامة
والذي اول مرة اساهم فيه
ارجو ان تعذروني
أود ان أقول لكم راها بدات الشتاء وهذا موسم تاع الفطير
وهذي والله اكلة شعبية متوارثة ن القدم
وهي تنافس الكلات العصرية
في التركيب والكميات الحريرية ونسبة الدهن والبروتين
لعلمكم طريقة تحضير الفطير معروفة عند الكل لنو مانضنش باللي كاين واحد جامي حضر لأمو أو جدتو وهي تعجن وتطيب فالفطير
على كل حال نخليكم مع الفطير وإلى اللقاء في مناسبة اخرى
يرجى من كل عضو يقولنا كيفاش يصنعو الفطير من البداية حتى النهاية وكيفاش ياكلوه بالمسقي والا بالحليب
واش التركيبة تاعو يعني كاين القمح والسميد والفرينة
وكاين زيت زيتونة والدهان والزبدة
وكاين اللي يديرو بالمسقس بالجاج والا بالداند الهند العروبي والا بالأرانب والا بالحجل
وكيفاش تكون اللمة تاع العاسلة
راني سخفت روحي باي

واقيلا البنات تاع المنتدى مايعرفوش يديرو الفطير على حسب معلوماتي ماتفكها غير انين القلب و الله أعلم

واله عندك الحق على حساب السكيتة راهم ما يفقهو فيه والو
بصح نقولك أنا نضريا نعرفلو مي تطبيقيا ربي يجيب

كيماقلت ياسين على حساب السكيتة ربي يجيب

ههههههههههههههههه وحدة فيهم ما كلاها قلبها وقالت أنا هنا راني قدها وأكثر

حساب الشوفة ان صح التعبير -البربوش- ما يعرفوش يخدموها

والله يا خالد البنات تاع هذا الجيل يحيرو راكم تخافو على رواحكم نهار تزوجو تلقاو نساكم ما يعرفو فيها والوا لا كسرة لا قاطو لا بربوش

راكم درتو فينا كامل وشنو هدا
والله هدا ظلم في حق الفتيات
ياخالد نعرف ندير البربوش والشخشوخة والتريدة وحتى الفطير
نقولكم الصح نعرف نعجن الفطير مي مازالني مابديتش نطيب
ونقولكم الطريقة نتاعو:
نحطو الدقيق في جفنة (القصعة) ثم نضيف الملح ثم نضيف الماء ونخلط حتى تولي عجينة
ونعجنها مليح ومنبعد نسقيوه بالماء حتى يولي طري ومنبعد نحمموه يعني نديروه على شكل كويرات صغيرة ونخليوه يسراح شوية .
ومنبعد بلل يدك بالزيت و جيب كويرة وطرحها على يدك وذلك بعد غسل اليد جيدا وكاين طريقة وحد اخرى وهي طرحه على شارب المايدة ومنبعد حطو يطيب على الطاجين .وكي يبدا يطيب شويا دهن بالزيت وقلب وهكذا حتى تخلص كامل.
منبعد نحيلو الحاشية ودير 2 فوق بعضاهم ودهن بالزيت الزيتون أو الدهان اذا كان عندكم البقر أو الزبدة ومنبعد طبقوا على شكل مثلث أو مستطيل .
أما بانسبة لي مسقي هو نفس الشي ماعدا الريشة تفتتها ديرها على شكل مربعات صغيرة وتفورو ومنبعد سقي وكول وشهية طيبة أمممممممم بنين
على فكرة الماء يكون بارد والزيت لي نستعملوه المرة الأولى راهو زيت صانقوا.

اقتباس :

زيت صانقوا

طريقة سهلة و رائعة بشرح ممتاز

ممكن تعطوني الكلمة المؤطرة باللغة العربية و شكرا

الأخت انين القلب شكرا على التوضيح والطريقة
بصح انا شفت ملاحظة وهي :
.... و جيب كويرة وطرحها على يدك وذلك بعد غسل اليد جيدا
هذي العملية تجي بعد ما تطرح الكويرات شوي على المايدة والا فالقصعة لا خاطر من المستحيل تتطرح على يدك وهي مازالت كوايرة
وفيما يخص التطباق تاع الريش بعد ماتتم التطياب يكون بهذي الطريقة
تحط زوج فايات فوق باعداهم بعد ماتدهنهم بمادة دهنية سواء زبدة والا زيت عرب وتطبقهم على النص يعني تدير نصف دائرة ثم تفرض تقسيم هذي النصف دائرة إلى ثلاث قطع متساوية
ويكونو يتلاقاو في وسط الوتر المستقيم وتطبق الطرف الأيمن على النصاني ثم الطرف الأيسر عليهم في زوج وتصير عندك شكل مثلث ويسمى المركبة
أما خالد فأنا أجاوبك حسب معلوماتي :
فزيت صانغو كمادة فهو بالعربية يعني زيت المائدة وهناك ماركات من كثرة تداولها واشتهارها صارت وكأنها مرادف لكلمة زيت المائدة وعلى سبيل المثال نوعية زيت عباد الشمس وزيت القطرة الذهبية
أما كلمة صانغو في حد ذاتها فلا أعرف ماذا تعني بالظبط فممكن تكون ماركة قديمة مشهورة لزيت المائدة

و الله ماني فاهم والو....؟؟؟؟؟؟؟؟؟

دوروها شخشوخة خير راني نحبها بزاف بزاف

حساب الشوفة يا أخي ياسين راك طباخ من الكبار

خالد كتب:

حساب الشوفة يا أخي ياسين راك طباخ من الكبار

والله والو يا خالد راني علابالي بيها من خلال المشاهدة المتكررة للوالدة الكريمة ربي يحفضها
وأنا من اللي كنت صغير منين تجي تدير الفطير وأنا قاعد معاها وخاصة كي تعود تطيب
راني ندخل فالطاجين حتى تقول أنا اللي كانطيب
ولمعلوماتك كاينة نوعية تاع الفطير يسموها ماما عيشة وتكون كاري وخشينة شوي
وراني نسيت عليها كيفاه يخدموها وهي تصنع من نفس العجينة اللي يخدمو بيها الفطير العادي وفق الطريقة اللي وضحتها الأخت أنين القلب
والشيخ علاه كيما فهمت فيها والو تبطل
نياخي تفهم كيغاه يتكل الفطير أمالا ماتكسرش راسك وكي يوجد رانا نعيطولك تمونجي
تحبو بالمركبات والا مسقي باش نوجدوهلك

و الله يالأخ ياسين ماخليتنا والوا منين ندورها نلقاوك انت خير مننا
الله يبارك ربي يسترك من العين
أما بانسبة لخالد زيت صانقو باللغة العربية هو زيت المائدة كيما قال الأخ ياسين
وياأستاذ انتظر كيفية تحضير الشخشوخة فالمواضيع المقبلة ان شاء الله
تحياتــــــــــــــــــــي لكم

شكورة الأخت أنين على ه\ا الكلام الحلو
ونتمنى أن الكل يكون معانا في المنتدى
وربي يكون فالعون والشيخ رانا نسناو فالشخشوخة تاعك